Stagioni
di
Fabio Messina
PRIMMAVERA
Cantu d’aceddi e ciauru i ginestra,
è tempu di rapiri attonna a finestra,
ntra na chiuvuta e na sciuta i suli,
calanu i rondini e si cuntanu favuli.
N’aceddu ccu l’ova e na palumma i mennula,
è paci di pasqua sutta la pampina,
nu scoppiu i culura nta la campagna,
la lapa nto ciuri po’ meli s’ampegna.
Tavuli fora nta li bar de’ paisi,
pisanti lu sonnu ppi cu è ca si susi,
i primi biosci ccu la granita i ceusi
e accuzzanu gonni, maglietti e causi.
Rosi e gersumini nta li barcuna splennunu,
furasteri ‘n vacanza ca sempri addumannanu,
festi e sagri di storia e focclori
e lu nnamuratu sona sirinati d’amuri.
Fabio Messina
23 Luglio 2005, Palazzolo Acreide
' STATI
Aria ferma e ventu i sciroccu,
lu mari è na tavula e lu tirrinu è siccu,
si scuara do’ cauru e u bruciatu è niuru,
sururi ca scula e acqua nta pila.
Nu massaru u frummentu meti,
arringrazia a Madonna e astuta a so’ siti,
li vacchi pascianu o calari do suli
e li cicali cantanu storii vissuti.
E a mentri u piscaturi la riti cala,
na sirena lu ‘ncanta e la luna si chianta,
lu puppu nto scogghiu s’ammuccia
e nu ciuri di mari s’asboccia.
Nu focu addumatu supra la rina,
carusi ca cantanu e amuri ca s’arriminina,
do’ cielu na stidda cari e disiu duna,
aspittannu ca u suli si junci a la luna.
Fabio Messina
21 Luglio 2005, Città Giardino Melilli
AUTUNNU
Na fogghia i platanu di la rama cari,
nta lu virdi ciumi e arriva fin’o mari,
lu primu friddu arrizza i capiddi
e qualchi nuvula ammuccia li stiddi.
E na pocu i genti pista a racina,
ballannu tarantelli di sira a matina,
mentri lu carusu torna a scola,
caricu i libbri e co’ pinzeri c’abbola.
Tornanu i morti a purtari riali,
biscotta duri e zippuli spiciali,
San Martinu port’ancora nu spicchiu d’astati
e intanto accumincianu i mali sirati.
Si canta nuvena prima i Natali
e s’arrusbigghia la luci finennu i durmiri,
na cesta china di nuci e castagni,
la tavula è cunzata e china di sogni.
Fabio Messina
22 Luglio 2005, Pachino
' NVERNU
Na conca addumata ‘ntra nu cerchiu i cristiani,
storii, cuttigghi e aranci nte mani,
de’ vitra a muddura comu na lacrima cula
e lu friddu nta l’ossa trasi e addimura.
Scinni lu carru di la montagna,
chinu di nivi e di spiritu i vigna,
genti ca curri ppi cuariarisi u sancu,
scarpi c’anfossanu a menzu a lu fancu.
Na stidda cumeta cosi novi porta,
na luci ca brilla nta na jurnata curta,
linticchia assapurata ppi spiranza i bona sorti,
buttigghia stuppata ntra nu scrusciu di botti.
E lu semi dormi sutta a terra ilata,
comu nu sonnu i disiu di na bella jurnata,
nu raggiu di suli pianu pianu crisci
e nu rivulu d’acqua di la nivi nasci.
Fabio Messina
21 Luglio 2005, Noto
